آسف حبيبتي , انت في مجتمع ذكوري سيكسيست جدااااااااااااااااااااااااا

آسف حبيبتي , انت في مجتمع ذكوري سيكسيست جدااااااااااااااااااااااااا

par Amal Belhassen, lundi 15 août 2011, 02:27 ·

آسف حبيبتي , انت في مجتمع ذكوري سيكسيست جدااااااااااااااااااااااااا

أيا سيدي , اليوم قريت زوز كمنتارات على البندرول السكسييست متاع حزب النهضه , الطفل قال : اي بنات تونس نا قصين تربية و الطفلة رجعت أعليه  قاتلو : انا مانيش من النهضة أما راهوا لمرا بلحق ما تنجمش تتقدم من غير عفة و حياء و هذا ماهوش فكر رجعي و كان جا حزب يساري و الا البوكت قالها راهي ولات حاجه أخرى الحكاية..
هاو شرجعت أعليهم , مشديتش روحي و كثرتلها برشه نعرف , حبيت نوصل رساله وكهو ما تكرهونيش هههه

يعني الرجل خاطيه ؟ ما لازمتوش عفة و حياء باش يتقدم , موش خلقنا ذكرا و أنثى ؟ موش الخطأ يتعاقب بنفس الطريقة و مانفرقوش مابيناتهم ؟ بنات تونس ناقصين تربية كيفاش ؟ قداش من مره نرى طفلة حليلتها  في الشارع يجيها طفل يرميلها كليمتين متاع قلة تربية , ميسالش نسامحوه راجل , يبدا ماد ساقيه في القهوة و يضيع في الوقت مع اللي ما يسواوش , ميسالش راجل , يتفرج كل ليلة في البورنو , ميسالش راجل , يبزنس و يشرب و يزني و يتكيف و يسب حتى الجلالة , ميسالش راجل , يرمي يديه على طفلة في المترو ميسالش راجل , يفسكي في الامتحان , ميسالش راجل , يمشي يكسر في ماتش الكورة و يعبيها بيرة و سبان و لغة مايعة , ميسالش راجل , يمشي للبحر بسليب محزوق وين تتعدى طفلة يبدى يمرجها , ميسالش راجل , قداش من مرة يكذب على أمو و يمشي يسهر في بلايص ما تليقش , ميسالش يبقى راجل , قداش من مرة يمد يدو على خوه الصغير , ميسالش راجل , قداش من مرة خرج مالدار "يتفرهد" و خلا امو واحله في القضية مامشاش حتى لعطار الحومه يسهل أعليها , ميسالش راجل , قداش من مرة مارافش على والديه و طاح عليهم بالمصروف أعطيوني وكان معندهمش يقلبها أعليهم , قداش من مرة يرى طفلة تتعرض لاعتداء و لا يقلقو فيها و عمل روحو مارا شي و ضحك عليها , ميسالش راجل, رمضان كامل فاطر و عامل فيها صايم قدام دارهم ينافق و معديها نومة نهار كامل , أما ميسالش راجل , و في الآخر ساعات يكركروه لصلاة العيد و يولي وقتها راجل ... أنا معمري لا شربت لا عمري لا سرقت لا عمري لا سبيت الجلالة لا عمري غشيت لا عمري مرفتش على والديا لا عمري لا تكيفت لا عمري سهرت في بواتا , كذبت أعليهم مرتين في حياتي و اعترفت , ماعمري لافطرت في رمضان , و يا جماعة أنا قلقتني البندرول , خاطر آنا موش أنانية و نعرف انو فمه بنات مختلفين أعليا فكريا عقائديا و سلوكيا لكنني نرتاحلهم أكثر من ألف منافق يعطيوني في دروس و هوما ما خبي كان أعظم , و باش اندافع أعليهم كاينني اندافع على روحي , و زاده من انتم باش تقيمو العفه و الحياء ؟ تلعبو في دور ربي ؟ وشنيا هالنموذج الأفقي اللي تحبو تحطوه للمرأة ؟ ت زوز اخوات معمرهم لا يشبهوا لبعضهم في المخ . يا سيدي نحن محتاجين انكم تقيلونا شويه نهار كامل نحن لبنات بينا و اعلينا و ناقصين و موش متربين وووو , و كمثال أقل حاجة الطفلة تغلط يسميوها *حبة , تحط سيقارو في فمها ,*حبة , تصوحب طفل , *حبة , وهو ميسالش راجل عندو الحق في كل ماهو لذيذ في الدنيا و آنا نبدى ديما مراقبة من كل الجهات ,و كيما يصير في المجتمعات الذكورية الكل  الطفل الفاشل في حياتو يبقى خير منا خاطرو راجل .. يزيو بلا ايبوكريزي و السكيزوفرينيا , حتى حد ما ادخل في تصرفاتكم كان والديكم ربي افضلهملكم , أغزرو لرواحكم قداشكم معوجين قبل ما تلومو عالأخرين , و نتوما تحطو الأشخاص اللي ما تعرفوهش في قوالب جاهزة و ما تحبوش تحاولو تتعرفو عليهم و تعطيوهم فرصة , خاطر الانسان المختلف هو عدوكم... تلقاو واحد مسيحي و لا يهودي و لا بوذي و لا ملحد تسبوه و تبداو توريو في عضلاتكم و قدراتكم في الشتايم , و هو محترم نفسو و لاعمرو جا على سيرتكم و متثقف خير منكم و عامل الخير أكثر منكم , تماهو قول ربي يهدي في قلبك و اتعدى على روحك يا منافق , لازم نحترمو بعضنا على اختلافنا و ما نفرضوش على الأخرين

ايجا تو نحكيو على البندرول السيكسيت : ياخي شبيكم تربطو فينا بالجنس ؟  "شكون انجم يعطيني تعريف للعفة و الحياء و هل ربي افرضهم كان علي المراة و الراجل لا" (منقول).. أربعة سنين مدسين ماهمش باش يخليوني نتقدم ؟؟؟ الشعر اللي نكتب فيه بأربع لوغات موش باش يخليني نتقدم ؟ الحفلات الفنية و صوتي ماهمش باش يسمحولي نتقذم ؟ العمل النقابي الملتزم اللي منخرطة فيه ماهوش باش يسمحلي نتقدم زاده ؟ اني مثلت تونس وعمري 13 سنة في ملتقى العربي للمبدعين بمصر ماهوش باش يسمحلي نتقدم ؟ انني نقرى في الكتب و نحاول نثقف روحي و اناقش لعباد الكل على اختلافهم موش باش يسمحلي نتقدم ؟؟؟؟؟؟
الجملة متاع " لا تقدم للمرأة دون عفة أو حياء" تلقاوهاشي في اليابان مثلا ؟ "كان الكارثة متاع اليابان صارت في بلاد تخمم بالعقلية هذي لا زمها أكثر من 20 سنه باش تنهض بروحها" .. و شمدخلكم في الحياة الجنسية متع العباد , ديما واحلين غادي في أخلاق أخلاق أخلاق يا منافقين ؟ تلهاو في حوايجكم و استروا